The Mortuary Roll of Amphelisa Prioress of Lillecherch in Kent (died cir. 1208-1221).

This Roll has been described by C. E. Sayle, M.A., for the Cambridge Antiquarian Society, Proceedings, vol. X, 1902-3, pp. 383-410: he gives a table of the 378 houses, including one incomplete entry, whose names appear on the roll.

The Brief at the head of the roll is as follows:

Uniuersis Christi fidelibus presentem paginam inspecturis Humilis ancillarum Christi conuentus ecclesie S. marie de lillecherch salutem in domino sempiternam.  Post imbres lacrimarum et fletuum inundationem quam in transsitu karissime domine et matris nostre piissime Amphelise priorisse uidimus. que uocante domino quinto decimo kal. Febr. uiam a qua nullus in hanc uitam reuertitur ingressa celo terreque debitum humani generis persoluit. terra quod suum est recipiente et spiritu reuertente ad dominum qui fecit illum. et postquam exequiarum sollempnia expleuimus quibus nec siccis occulis nec sine crebis singultibus interesse potuimus manum misimus ad chalamum uniuersitati uestre scripto denunciantes chalamitatem quam patimur.  Subtra(c)ta enim tanta matre tam fida comite in uia hac qua ambulamus simul et cor nostrum dereliquit nos.  Hec enim dilecta deo et hominibus quod insigne est in hiis qui presunt in omnibus se ipsam nobis bonorum operum prebuit exemplum.  Requiescebat in ea spiritus noster per quam licebat delectari in domino meditari liberius orare securius.  Erat enim nobis exemplo eius oratio pinguior lectio frequentior et affectus feruentior. sed sublata est et hec omnia simul.  Dolemus igitur in domino dilectissimi. dolemus nobis ademptum tam dulce solatium. tam fidele auxilium. tam salutare consilium.  Dolemus non quia dolenda sed quia ablata.  Credimus enim quod mors eius in conspectu domini sit preciosa. quam precesserunt gloriose conuersationis insignia.  Tamen quia nullus adeo perfectus est qui uite huius spacia pertranssire possit quin saltem in minoribus et leuibus peccatis frequenter offendat uniuersitatem uestram rogamus attencius ut nostre amaritudini condolentes predicte matri nostre beneficia orationum uestrarum impendatis.  Tenemur itaque caritatis uinculo quo religiosi et sancti mutuo ligantur in domino pro defunctis uestris exorare ut a peccatis soluantur.  Subuenite igitur fratres karissimi anime priorisse nostre defuncte piis orationibus uestris ut omni labe purgata intret in gaudium domini sui. recipiens cum sanctis et electis dei refrigerii sedem. quietis beatitudinem luminis claritatem.  Prestante d. n. I. C. cui est honor et gloria in sec. sec.  Amen.